معجزة للشهيد العظيم فليوباتير مرقوريوس ...............................................

يا شهيد الرب الحق ارجع من غيره اذاي !!!!؟؟؟؟








يعسكر ملاك الله حول كل خائفيه وينجيهم
مز 33 : 6
السيده / اميره صبحي - القاهره

للشهيد ابو سيفين محبه كبيره في قلبي وحريصه دايما اني اقري كل كتب معجزاته وزيارته في ديره في مصر القديمه وعلشان تعلقي الشديد بيه سميت ابني التاني علي اسمه فيلوباتير
وها احكيلكم اذاي ربنا وهبب ابننا ابانوب عمر وحياه جديده لما بعتله الشهيد العظيم ابو سيفين عشان ينقذه من موت اكيد عشان كل الي شاف الحادثه قال ان ابانوب كان ها يطلع جثه مهلهله
روحت انا وزوجي عادل واولادي ابانوب وفيلوباتير لمدينه شبين الكوم عشان نقضي عيد القيامه مع اسرتي وبنتجمع في بيت العيله اخواتي واخوات زوجي واولادهم نقضي الجمعه العظيمه وسبت النور وشم النسيم ونرجع تاني للقاهره
بعد الغدا في يوم عيد القيامه 6/5/2001 نزل ولااد اخوياه وولااد اختي علشان يلعبوا قدام البيت وكان معاهم ابانوب وكان عمره 6 سنين وفي وقت ما كانوا بيلعبوا مرت عربيه بيجو بسرعه كبيره جدا وكان ابانوب واقف وقتها في نصف الشارع فصدمته العربيه ومن اضطراب السواق داس بنزين بدل ما يدوس فرامل فا العربيه اخدت ابانوب وسحلته وهي بتجري بسرعه كبيره جدا واخيرا وبعد مسافه ما تقلش عن 10 امتار خرج ابانوب من مؤخره السياره يعني هوه دخل من مقدمه العربيه وسحلته كل المسافه دي وبعدها خرج من مؤخرتها وعليكم تتخيلوا كان منظر الولد ايه وهوه خارج من تحت العربيه كتله دم
كان اخوياه المهندي امير واقف في البلكونه وشاف الي حصل فا في وقتها راح ناطط بهدوم البيت وكنا في الدور الاول وشال الولد وجيناه بيه علي مستشفي القصر بشبين الكوم وكنت طول الطريق في حاله صعبه ومنهاره وكنت حاسه اني ابني فقدته خلاص وكنت بصلي وانادي علي الشهيد ابو سيفين واقوله
انجدنا يا اله ابو سيفين ... الحق ابانوب يا شهيد الرب ... اطلب من رب المجد وما تسيبناش ... اذاي ارجع من غيره .. !!!؟
الساعه وقتها كانت 5.30 بعد الظهر ولما الولد دخل الاستقبال واجروله الاشعات والفحوصات كانت المفاجاه المذهله
الولد سليم مفيهوش اي حاجه والدكاتره كانوا مستغربين وسالونا تاني
انتو متاكدين ان الولد ده العربيه داست عليه !!!؟؟؟
فقلنالهم ايوه والدليل ان صاحب العربيه معانا
ولما شوفنا ابانوب ما لقيناش فيه غي بعض جروح في جبهته ومؤخره راسه والكوع والركبه
والدكاتره من كتر تعجبهم واستغرابهم قالوا لا دي تلااقيها عجله هيه الي خبطت الولد ومش عربيه وعشان الاحتياط ها نحطه تحت الملاحظه 24 ساعه علشان نطمن
نشكر ربنا كان كل شيئ طبيعي والولد ما فقدش وعيه وما عاناش من اي قئ فقالنا الدكاتره ان الولد بخير ويقدر يطلع من المستشفي ومفيش قلق عليه طالما الولد واعي
قبل ما نرجع البيت روحنا كنيسه مار جرجس وكان وقتها سيدنا الانبا مينا كان عامل اجتماع للشعب ولما دخلنا القاعه فوجئ سيدنا بمنظر ابانوب وراسه الملفوفه بالشاش فحكيناله الي حصل فا اتعجب وقال اشكروا ربنا الي اداله عمر جديد في عيد قيامته
رجعنا البيت والساعه 4 الفجر صحيت ابانوب علشان اديله المضاد الحيوي فقال لي
" يا ماما انا شوفت تحت العربيه سيفين بس سيفين صغيرين وانا كنت لابس ابيض لون الثلج كنت خايف في الاول لكن لما شفت السيفين عرفت ان الشهيد ابو سيفين معاياه وانه ها يحافظ عليه
شكرنا كلنا رب المجد يسوع المسيح ورجعنا القاهره وتابع ابانوب دراسته وكان وقتها في اولي ابتدائي وبنعمه المسيح طلع الاول علي المدرسه
المعجزه دي اتسجلت في الدير بتاريخ 29/8/2005 وابانوب كان حاضر وقت تسجيلها وكان مر علي الحادثه دي 4 سنين

فشكرا يا شهيد الرب